মাজুলী : ৩৫০ বছৰীয়া পুৰণি আউনীআটী সত্ৰৰ হস্তশিল্প হেঙুল -হাইতাল বুলোৱা বেতৰ বিচনীৰ জি আই টেগৰ অৰ্জনৰ চেষ্টা অব্যাহত থকাৰ সময়তে বিচনী গৈ পালেগৈ আমেৰিকাৰ ভান্দাৰবিল্ট (Vanderbilt) বিশ্ববিদ্যালয়। আমেৰিকাৰ নাচভিলে টেন্নেচ্চিস্থিত (Nashville Tennessee )বিশ্ববিদ্যালয় খনৰ বায়'মেডিকেল ইঞ্জিনিয়াৰিঙৰ প্ৰফেছাৰ ড০ ক্ৰেইগ ডুভালৰ হাতত সত্ৰীয়া ঐতিহ্যৰ অন্যতম ৰাজকীয় বাহক বিচনীখন তুলি দিয়েগৈ মাজুলীৰ সূ -সন্তান বিজ্ঞানী ড০ জাহ্নু শইকীয়া।  চাৰি সত্ৰৰ অন্যতম মাজুলীৰ শ্ৰীশ্ৰী আউনীআটী সত্ৰত ভকতসকলে সত্ৰৰ আদিকালৰে পৰাই চৰ্চা কৰি অহা এই অপূৰ্ব হস্তশিল্প বিধক আন্তৰ্জাতিক মঞ্চত পৰিচয় কৰোৱা আৰু এই শিল্পৰ উৎকৰ্ষ সাধন কৰি এখন বিশাল উদ্যোগী ক্ষেত্ৰৰ সূচনা কৰাৰ পৰিকল্পনাৰে স্বেচ্ছাসেৱী সংগঠন "মাজুলীৰ সাহিত্য "ই যোৱা দুটা বছৰে প্ৰয়াস অব্যাহত ৰাখিছে। হস্তশিল্প বিধলৈ জি আই টেগৰ স্বীকৃতি অৰ্জনৰ যোগেদি সেই প্ৰয়াস আগুৱাই নিয়াৰ লগতে নতুন এচাম যুৱকক প্ৰশিক্ষণেৰে ক্ষেত্ৰখনক শক্তিশালী কৰিবলৈ সংগঠনটোৱে কাম কৰি আহিছে। সেই পদক্ষেপৰ অন্তৰ্গত এই শিল্পবিধক সাত সাগৰ তেৰ নদী সিপাৰৰ আমেৰিকালৈ প্ৰেৰণৰ ব্যৱস্থা কৰে। ১৫৩ বছৰ পুৰণি এখন বিখ্যাত বিশ্ববিদ্যালয়ৰ চৌহদত মাজুলীৰ সত্ৰীয়া হস্তকলাৰ নিদৰ্শনে প্ৰথমবাৰলৈ ভুমুকি মাৰিবলৈ সক্ষম হোৱাই আগন্তুক সময়ত ইতিবাচক বাৰ্তা কঢ়িয়াই আনিব বুলি সংগঠনটোৱে আশা প্ৰকাশ কৰিছে লগতে এনে এক মহৎ কৰ্মত সহায় কৰাৰ বাবে ড০ শইকীয়ালৈ কৃতজ্ঞতা জ্ঞাপন কৰিছে সভাপতি কমল দত্ত‌‌‌ আৰু সম্পাদক গোবিন কুমাৰ খাউণ্ডে। উল্লেখযোগ্য, মাজুলীৰ সাহিত্যই বেতৰ বিচনী খনৰ এটি সুন্দৰ গ্ৰীফ্ট বক্সত ভৰোৱাৰ লগতে বক্সৰ ওপৰত বিচনীখনৰ এটি সংক্ষিপ্ত পৰিচয় ইংৰাজীত লিপিৱদ্ধ কৰিছে যাতে এই ঐতিহাসিক সম্পদটিৰ বিষয়ে বিদ্বৎ মহলে জানিবলৈ সুবিধা হয়। উল্লেখযোগ্য, ইতিমধ্যে, মাজুলীৰ সাহিত্যৰ নিজা ৱেৱচাইট (majulirxahitya.org) ত উক্ত বিষয়ে বিতং তথ্য প্ৰকাশ কৰিছে সংগঠনটোৱে।

News Articles